بغداد ایئرپورٹ کا وہ خونیں سویرا؛ جہاں رازوں کے امین اور وفادار محافظ تاریخ بن گئے!

3 جنوری 2020 کی وہ رات محض ایک جنرل کی شہادت کا قصہ نہیں تھی، بلکہ یہ ان وفادار ساتھیوں کے مشترکہ فیصلے کی تکمیل تھی جنہوں نے برسوں حاج قاسم سلیمانی کے پہلو میں سائے کی طرح رہ کر موت کو شکست دی۔ ابو مہدی المہندس سے لے کر نوجوان وحید زمانی تک۔

مہر خبررساں ایجنسی، بین الاقوامی ڈیسک: سال 2020 کے بعد سے، جنوری کا مہینہ اب محض موسمِ سرما کا آغاز نہیں رہا۔ کلینڈر، ہر سال اس مہینے میں ایک ایسے نکتے پر پہنچتی ہے جہاں ایرانیوں اور خطے کے عوام کا اجتماعی حافظہ لاشعوری طور پر پیچھے کی طرف لوٹ جاتا ہے؛ 3 جنوری کی اس صبح کی طرف اور اس خبر کی طرف جو مقامی اور غیر ملکی میڈیا پر تیزی سے نشر ہوئی تھی۔ ایک مختصر مگر سنگین خبر: بغداد ایئرپورٹ پر سپاہِ پاسدارانِ انقلابِ اسلامی کی قدس فورس کے کمانڈر کا قتل۔

وقت رات کے تقریباً 1:20 بجے تھے جب بغداد ایئرپورٹ ایک ٹارگٹڈ حملے کا منظر بن گیا؛ ایک ایسا حملہ جس نے نہ صرف ایک فوجی کمانڈر، بلکہ ان کے قریبی ساتھیوں کے ایک گروپ کو بھی نشانہ بنایا۔ خبر کی اشاعت کے ابتدائی گھنٹوں میں میڈیا کی توجہ ایک ہی نام پر تھی؛ لیکن شہدا کی فہرست پر غور کرنے سے دوسرے نام بھی نظر آتے تھے؛ وہ ایرانی اور عراقی نام جو برسوں تک مختلف مشنوں میں، میدانوں اور سفروں میں، حاج قاسم سلیمانی کے پہلو میں موجود رہے۔

اس واقعے نے دو قوموں کے درمیان ایک مشترکہ سوگ رقم کیا۔ ایران اور عراق کے کمانڈرز اور فورسز جو طویل برسوں تک ایک ہی محاذ پر نظر آتے تھے، اس بار ایک ہی نکتے پر سفر کے اختتام کو پہنچے۔ یہ ہمراہی جو ان میں سے بعض کے لیے محض ایک تنظیمی ذمہ داری یا عارضی مشن نہیں تھی، بلکہ ایک شعوری انتخاب تھا جس نے ان کی زندگی کا رخ بدل دیا اور ایک مشترکہ تقدیر تک لے گیا۔ یہ رپورٹ ان ساتھیوں کے ایک حصے پر طائرانہ نظر ہے؛ وہ افراد جن میں سے بعض کتابوں اور تحریری روایتوں کا موضوع بنے اور بعض دیگر اب بھی کم پہچانے جاتے ہیں۔ اس رپورٹ کی توجہ اسی ہمراہی پر ہے؛ وہ ہمراہی جو آخر کار بغداد ایئرپورٹ پر اختتام کو پہنچی۔